Amasa-Villabona eta Zizurkilgo Udalek gogoan izan dute Izaskun Zuriarrain Arratibel eta ohar partekatu bat argitaratu dute. Honakoa da:
Izaskun Zuriarrain zizurkildarra zendu zen igandean, 87 urte zituela. Gertukoei doluminak adierazteaz gain, Zizurkil eta Villabonako Udalok, bere heriotzarekin bat, memoria eta egiarekin dugun konpromisoa berretsi nahiko genuke.
Izan ere, Zuriarrainen bizitza osorik baldintzatu zuen 36ko altxamenduaren osteko gertakari krudel batek. Frankistek aginduta, italiar hegazkin faxistek 1936ko abuztuaren 13an Donostian egindako bonbardaketa anker eta indiskriminatu batean Izaskun Zuriarrain larri zauritu zuten, ondorioak utziz bizitza osorako. Bonba hark Manuela eta Eulalia 13 eta 15 urteko bere bi ahizpak hil zituen.
Bonbardaketa berean Villabonako beste bi anaia txiki ere hil ziren: Josecho eta Aniceto Santamaría, 10 eta 30 hilabetekoak.
Zorigaiztoko egun hartan faxismoak gure herrietako lau haur hil zituen.
Francoren diktadurapean, urteetako ahanztura eta bazterketa pairatu behar izan zituzten biktima guzti horiek. Baina berandu bada ere, azken urteetan ari da egia eta aitortza bidea egiten, herrian ditugun taldeen ikerketen eta Udalon bultzadarekin, besteak beste.
Idatzi xume honen bidez, Izaskun Zuriarrain eta beste biktima guztientzat egia justizia eta aitortza aldarrikatu nahi ditugu.
Beren izenak ahaztu ez daitezen, bide horretan jarraituko dugu.
Izan bekio lurra arina.
Zizurkilgo Udala eta Amasa-Villabonako Udala