Udalak energia hornidura kontratua sinatu du Goiener kooperatibarekin

Erabiltzailearen aurpegia Amasa-Villabonako Udala 2020ko eka. 8a, 13:40

Aurrerantzean Amasa-Villabonako udalak kontsumituko duen energiak jatorri berriztagarria izango du.  

Udalaren beharretarako energia hornidura zein enpresak egingo zuen erabakitzeko garatutako esleipen prozesuan GOIENER, S.COOP kooperatibak lortu zuen puntuaketarik altuena. Izan ere, udal gobernuak energia horniduraren ezaugarriak eta baldintzak ezarri eta baloratzeko garaian, garrantzia berezia eman nahi izan dio Amasa-Villabonako udalak kontsumituko duen energiaren jatorria %100ean berriztagarria izateari.

Pasa den ekainaren 3an sinatu zen kontratua, bi urtetako iraupena izango du eta gehienez beste bi urtetara luzatzeko aukera izango du udalak.  
 
Beraz, udal gobernuaren iritziz, honakoa beste urrats sendo bat da udalaren jardueraren jasangarritasuna lortzeko bidean. Munduaren eta gizateriaren etorkizuna kolokan jartzen duen larrialdi klimatikoari aurre egiteko, ezinbestekoa da ekonomia berde eta benetan jasangarria lortzeko pausuak ematea eta udalak norabide horretan jarraitzeko konpromiso irmoa du.
 
Gainera, udal gobernuak oso positiboki baloratzen du hornidura hau ekonomia sozial eta ekologikoan erreferentea den euskal kooperatiba batek egitea, energia multinazional handi eta boteretsu baten ordez. 
 

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!