Astelehenetik aurrera Amasa-Villabonako baratze parkea irekita egongo da eta erabiltzaileek baratzeak berriz erabili ahal izango dituzte, hori bai, aldi berean ezingo da pertsona bat baino gehiago bertan lanean egon. Baratze parkeko txabola irekita egongo da eta bertako tresneria erabili ahal izango da.
Aisialdirako baratze ez profesionaletan jarduteko debekua altxatuta, baratzea duten herritarrek eremu partikular horietan duten uzta jaso eta berria erein ahalko dute. Amasa-Villabonako aisialdirako baratzeetan 17 erabiltzaile inguruk jarduten dute.
Landatutakoa jasotzeko aukera zabaltzearekin batera, baratzeen erabiltzaileek aukera izango dute landare eta haziak ereiteko. Horiek eskuratzeko, astearteko azokan landareen postua egongo da edo bestela zuzenean hornitzaileengana jo beharko da, etxez etxeko edo zuzeneko zerbitzuak erabilita.