Gaur hasi dira Uraren Euskal Agentziak (URA) Kale Nagusia eta Oria ibaiaren artean dagoen ibilbidean egingo dituen lanak. Obra honen bidez, Kale Nagusiko hainbat etxebizitzetako ur zikinak kolektore nagusira lotuko dira ondoren Adunako depuradorara bideratuz. Modu honetan, hemendik aurrera ur zikin horiek ez dira zuzenean Oria ibaira isuriko eta aurrera pausu bat emango dugu gure ibaiaren ur-kalitatea hobetzen jarraitzeko eta orokorrean ibaiko ingurumenaren alde.
Obra honek denbora aldetik gehienez 3 hilabetetako luzapena izango du eta 188.000 euro inguruko aurrekontua du. Obra egiteaz Jaizubia eraikuntza enpresa arduratuko da.
Lanak, Erreka taberna ondoan dagoen etxepeko pasabidetik hasiko dira eta piskanaka Udaletxe aldera luzatuko dira. Gehienbat lubakiak zulatuko dira, ur zikinen kolektorearen aldaketa egiteko eta beharrezkoak izango diren tuberia berriak ezartzeko.
Obra guztiek bezalaxe, honakoak ere eragozpenak sortuko ditu eremu horretan, beraz, aldez aurretik barkatu eragozpenak.
