Ikasturte amaiera iristear da, eta horrekin batera ikastetxeek jaiak antolatzen dituzte. Horietako bat da Ibarrako Uzturpe ikastola. Hain justu, larunbatean, Uzturpeguna ospatuko dute, 11:00etatik aurrera, Belabieta kiroldegian. Aurten, urtaroak landu dituzte eta horretan buelta maila ezberdinetako ikasleek ikuskizun ezberdinak prestatu dituzte. Bestetik, ikastolak bere dituen balore euskaltzaleak eta hezkidetzaileak islatzeko ekimen sorta antolatu du.
Aurtengo egitarauan ordea, berrikuntzak izango dituzte. Horietako bat da 14:00etan Ikastolako aterpean egingo duten bazkari herrikoia. Bertaratuko diren jankideei bazkarirako mahai tresna eta mahai-zapiak ekartzeko gogorarazi dute antolatzaileek. Bazkal ostean ekimen ugari prestatu dira haur, gazte eta helduen gozamenerako, eta arratsaldean zehar Photocall gune bat ere izango da.
EGITARAUA
- 11:00. Ikastolako ikasleen jaialdia, Belabieta kiroldegian.
- 13:00. Pilota txapelketako finalak, frontoian.
- 14:00. Bazkari herrikoia, ikastolako aterpean.
- 15:30. Aisialdi saioak.
- 16:00. Toka txapelketa.
- 17:00. Dantza tailerra eta Dantzaldia.
- 19:00. Festa amaiera.