Khmer Gorriak intelektual talde bat zen, Frantzian sortua eta Pol Pot buru zutena. Haren zuzendaritzapean, maoismoaren eta estalinismoaren idealetan oinarritutako nekazaritza-eredu sozialista zuen erregimena ezarri zen. Bere politikaren ezaugarri nagusiak hauek izan ziren: hiriguneetako biztanleen landatze behartua, torturak, exekuzio masiboak eta behartutako lan orokorrak. Adituek diote Khmer Gorrien diktadurak iraun zuen bitartean herrialdeko biztanleriaren laurdena desagertu zela.
Honen guztiaren lekuko da Tuol Sleng Krimen Genoziden Museoa, Pol Poten Khmer Gorriek S-21 bezala izendatu zuten atxilotze eta tortura zentroa. Beldurgarriak dira torturatzeko erabili zituzten gelak eta tresneria, korridoreak…
«14.000 bat pertsona igaro ziren zentrotik, horietatik 12 baino ez ziren bizirik irten bertatik»
Eraikinak arantzazko alanbrez itxi ziren, eta leihoak burdinazko barraz estali. Torturatuak izan ziren zenbait pertsonen argazkiak ere ikusi daitezke, 14.000 bat pertsona igaro ziren zentrotik, horietatik 12 baino ez ziren bizirik irten bertatik.
Idazten ari naizen bitartean, han nengoela pentsatu nuen berdina pentsatzen ari naiz, gizateriak desagertzea merezi duela. Ikusi besterik ez dago, adibidez, gaur egun Gazan bizi duten egoera.