Berriro ere aberastea herritar xumeon helburu goren. Ikusiko dugu gero nola banatuko dugun, baina toka dadila. Utikan desberdintasun sozialak abenduaren 22an. Zerbait mereziko dugu, ba, hain gaizki tratatzen gaituen mundu honetan...
Tripako mina jartzen didate horrelako jokoek. Billete-sorta amuan jarrita, onura pertsonala bilatzen duten ekintzek. Boleto bakoitzak balio dituen hogei euroek ez dute hain erraz hegan egiten diru-zorroetatik beste zenbait kausetarako. Zer esanik ez zergak ordaintzeko denean (nahiz eta loteriaren prezioaren zati handi bat horretarako erabili).
Aberatsekiko kritikak non geratzen diren jakin nahi nuke, behin «gordoa» kontu korrontean, bankuak dirua bertara eramateagatik oparitutako Audia garajean eta bekadunak ziren seme-alaben pentsio planak zeroz beterik ikustean.
Ez dira ordea hogei euroak, xanpain botilak edo saritueTeteleberriko adierazpenak. Eredua da, diru-gosea, zentzu solidarioaren falta. Ez da, agian, loteria bera. Gizartea da akaso, loteriaren bidez bere alderdirik ilunenetako bat erakusten duena.