Bere helburu nagusia laneratzeko zailtasunak dituzten pertsona zaurgarriak, emakumeak eta gizarte bazterkerian daudenak bereziki, lan merkatuan sartzea da, horretarako formazio-ekintzak sustatuz.
Beste egitasmo batzuen artean, Elkar-Ekin izeneko proiektua garatu dute ikasturte honetan, Gipuzkoako Foru Aldundiaren Elkarrekin Lanean laguntza-programari esker. Modu horretara, bi arlotako profesionaltasun ziurtagiriak eskuratzeko martxora bitarteko prestakuntza teknikoa eta enpresetan praktikak egiteko aukera eskaini da.
Garapen agentziaz gain, Fundacion Empleak, Peñascal Kooperatibak, desgaitasuna duten pertsonekin lan egiten duen KateaLegaia enpresak eta etorkin magrebtarren integrazioa helburu duen Jatorkin elkarteak gauzatu dute, elkarlanean.
Orotara 23 pertsona izan dira proiektuaren onuradun: zortzi pertsonak hezkuntza ez arautuko irakasle izateko formazioa jaso dute; eta beste 15 pertsonak biltegi eta logistika lanetarako ziurtagiria eskuratu dute.
Foroa hurrengo ikasturtean pentsatzen jarria da dagoeneko, eta enplegagarritasuna eta inklusioa modu bateratuan landuko dituen hurrengo proiektuaren oinarriak finkatzen hasiak dira. Ikasturte berriarekin batera emango dira xehetasun guztiak.
Bitarte horretan, aukera gehiagoren berri jakin nahiko lukeenak, Enplegu Sailarekin harremanetan jartzeko aukera izango du, lan@tolosaldea.eus helbidera idatziz, 943 654 501 telefonora deituz edo Lehiberri Zentrora gerturatuz.