Tolosaldeko IKT Astearen 9. edizioa ospatuko da azaroak 20 eta 24 artean

Aurtengoan, sentsibilizaziorako eta prestakuntzarako balio duten jardunaldi hauek, zuzentzen diren taldeen araberako gai eta ordutegi banaketa izango dute: enpresa industrialen alorrean diharduten pertsonei begira, goizeko ordutegian landuko dira lan munduarekin zerikusi zuzena duten gaiak; merkatariei aldiz, eguerdiko ordutegian eskainiko zaizkie beraien interes eta aplikaziokoak izan litezken gaiak, eta arratsaldeko ordutegian aldiz, edozein pertsonari orokorrean interesa lekizkiokeen gaiak jorratuko dira. Goizeko jardunaldiak, Apattako Lehiberri Zentroan emango dira, eta aurtengoan lehen aldiz, eguerdi eta arratsaldekoak Tolosako Oriaburu eraikinean.

Urtero, edizio bakoitzean, 200 pertsona baino gehiagok parte hartu izan ohi dute Lehiberrik antolatzen duen ekimen honetan. Mondragon Unibertsitateko adituek azalduko dituzte IKT-ei lotutako aukera eta berrikuntzak. Ekimen hau, Eusko Jaurlaritzak, SPRI enpresa publikoaren bitartez kudeatzen duen Enpresa Digitalak IKTen bitartez enpresen garapena sustatzeko programa diruz laguntzen du.

Jardunaldi hauek, euskal erkidego mailan aitzindariak izan ziren martxan jarri ziren momentuan, eta azken bederatzi urteotan zehar, Gipuzkoa eta Arabako eskualde eta herri desberdinetan errepikatu dira.

Aurtengoan goizez jorratuko diren gaiak, industria 4.0, enpresentzako zibersegurtasuna, hodeiko zerbitzuak, datuen babesa edota erreminta digitalekin produkzioa nola hobetu izango dira. Merkatariek, Learn by doing, eginez ikasi metodologiarekin, beren jardueretarako onuragarri diren gaiak landuko dituzte, eta 18:00etan publiko orokorrari zuzendutako saioetan, sare sozialen arriskuei buruz, linkedin sare sozialaren aukerei buruz, eta gaur egungo teknologia berriei buruz ariko dira aditu desberdinak.

Informazio gehiago, Euskadi+innova eta Lehiberriko webguneetan, www.euskadinnova.net eta www.lehiberri.eus eta baita 943654501 telefono zenbakian edota lehiberri@tolosaldea.eus email helbidean ere lortu liteke.