Lehen urtean eginiko Enpleguneak emaitza onak eman bazituen, bigarrenekoak ere ez dira gutxiagorako izan. Maiatzean amaitu zen azken enplegu plana eta balorazioa oso positiboa da. 2015eko urrian 52 kontratu sinatu ziren, eta behin diru laguntza epealdia amaituta ere, hau da, 2016ko ekainean, horietatik 23k enpresa berean jarraitzen zuten lanean. Horrenbestez, helburuak bete dira. Lehen kontratazioak egitetik haratago, xede nagusia, diru laguntzaren epealdia amaitu arren, kontratuak jarraikortasuna izatea baita.
Enplegu programaren bitartez kontratatuetatik 23 emakumeak izan ziren eta 29 gizonezkoenak. Ekainean, berriz, 12 emakumek eta 11 gizonek jarraitzen zuten lanean. Beraz, enplegu programan parte hartu zutenen %44ak. Parte hartu zuten enpresa eta langabetuek programaren balorazio positiboa egin dute eta erakutsi, enpresa pribatuei bideratutako kontratazioetarako diru laguntzak enpleguaren sorreran lagundu duela. Tolosaldea Garatzeneko arduradunak ere gustura daude datuekin «hauek erakusten baitute prozedura ongi garatu zela eta emaitzak egindako lan andanaren ondorio direla».