Horrela, autobus zerbitzu berriak eskualdeko herriak elkarrekin lotzeko balioko du baina baita Tolosaldea jasangarriago bat lortzeko ere. Izan ere, etorkizunean, Tolosaldea jasangarriago, orekatuago eta kohesionatuago bat nahi baldin badugu, denok elkarrekin pauso txiki batzuk eman beharra dauzkagu, eta ohitura batzuk aldatu, hala nola, autoaren gehiegizko erabilera. Horregatik, aldaketa horretarako tresna baliagarri izango da autobus zerbitzu berria.
Badakigu garraio publikoa erabili behar dela esateak ez duela zentzurik, gero, baliabideak eta aukerak eskaintzen ez badira. Horregatik, zerbitzu berriarekin, aldarrikatzetik martxan jartzera pasa gara eta modu honetan, zerbitzu osatu eta erabilgarri bat eskaintzera. Horren adibide, esaterako, ondorengo datuak: joan den urtera arte, 308.000 kilometro inguru egiten zituzten autobusek Tolosaldean, eta aurrerantzean, eskaripeko zerbitzu guztiak erabiliko balira, 811.000 kilometro. Beraz, kilometro kopurua %163 igo ahalko da. Baina horretarako, ezinbestekoa da zuen, herritarren inplikazioa. Errepideetan gora eta behera, herrian barrena, autobusak jendez beterik ikusi nahi baititugu, eta ez hutsik. Horretarako, zerbitzuaren inguruko informazioa ondorengo lekuetan aurkitu dezakezu:
Internetez: www.lurraldebus.eus
Telefonoz: 900 234 555