Hamabiak puntu-puntuan hasi zen norgehiagoka, eta baloiaren jabetza nagusi baten ondorioz iritsi zen Eneritzen gola urrutiko ezkerkada batez. Baloiaren jabe gu izan arren, ordu erdi igarotakoan berdindu zuten emaitza Bizkerreko neskek, eta horrelaxe joan ginen atsedenaldira. Bigarren zatia gogotsu ekin genuen. Erraz jokatzen utzi ez ziguten arren, Nora Galarzak bigarren gola sartu zuen korner batean buruz, eta berriro ere markagailuan aurre hartu genuen. Aukera garbiak izan genituen behin eta berriz, baina ez genuen hirugarrena sartzea lortu azken minutuak arte. Helenek beste behin ezkerrez barrura –bere hanka ona eskuina omen da, baina gure dudak dauzkagu…–, eta horrelaxe amaitu zen partida, 1-3.
Aurkariei eskua eman, txalo zaparrada ikusleei eta jokalariak aldageletara. Barruan, garaipeneko argazkia eta denak poz-pozik etxera.
Azaroan lau neurketa ditugu, hamabi puntu jokoan, eta lehenengo hiruak jada poltsikoan. Ea hurrengo hiru jardunaldietan berdin mantentzeko gai garen. Bide onetik goaz!