Indarberritzeko unea iritsi da

Urteko azkenengo partida izanda, gogo eta urduritasunez murgilduta txapelketako talde gogorrenetariko baten aurka borrokatzeko prest hasi genuen arratsaldea. Musikaz beteriko beroketa baten ondoren, Aritzen hitzak entzun eta hasiera eman zitzaion gure azkenengo neurketari.

Hasiera bikaina eman genion partidari, erdiko sakearekin hasi eta minutu gutxira heldu baitzen lehenengo gola Leyreren eskutik. Bagenekien partida osoa aurretik geratzen zela, horregatik, gure entrenatzailearen «burua hotz, bihotza bero» hitzak kontuan hartuta, hiru puntu horiengatik borrokan jarraitu genuen. Gogor eutsi genion aurkako taldeko erasoei baina akats baten ondorioz jaso genuen lehenengo gola. Berdinketarekin joan ginen atsedenaldira, Aritzen aholkuak entzuteko eta partidari aurre egiteko asmoz.

Bigarren zatia hasi eta minutu gutxira, akzio arriskutsu baten ondoren falta bat kontran jaso genuen. Arriskua agerian egon arren, berdinketari eustea lortu genuen. Partidarekin jarraituz, aurkako taldearen mugikortasunak ez zizkigun gauzak batere erraz utzi. Eraso batzuk jaso eta errebote batetik etorritako baloiak eman zien garaipenaren esperantza Arratiako jokalariei bigarren gola lortuz. Handik minutu gutxira, Sarak lapurtutako baloi bat Ainararen hanketara heldu eta jokaldi izugarri batek eman zion berdinketaren gola Tolosari.

Berdinketarekin amaitu zen partida, berriro ere etxean puntu bat lortuz. Hilabete bateko atsedenaldia aprobetxatzeko ordua iritsi da, Gabonak familia eta lagunekin pasatzeko ordua. Hurrengo urterako indarberrituta iristeko unea, denboraldiaren bigarren zatiari hasiera bikaina emateko.