Larunbateko arratsaldeko 18:15etan elkartu ginen Usabalen, derbiko 3 puntuak borrokatzeko prest. Ordutegi ezohikoa izan arren, taldea ondo aktibatu zen beroketan eta indarrez beteta zelairatu zen.
Partidaren hasieran Añorga nagusitu zen arren, egoerari buelta ematea lortu genuen. Gure jokoa egiten hasi eta berehala etorri zen Garaziren gola. Tamalez, gola ez zen markagailura igo, jaurtiketa baino lehen Garazik baloia eskuarekin jo zuen eta. Segidan aurkariaren gola iritsi zen, taldearen desoreka baten ondorioz. Emaitza gure alde ez egon arren, lehen zatia baloiaren jabetzarekin eta sentsazio onekin amaitzea lortu genuen.
Bigarren zatian ere gure nagusitasuna nabaritu zen. Aukerak izan arren eta zelaian dena eman arren, ez genuen lortu baloia sareratzea eta ezin izan genuen punturik lortu.
Igande honetan erronka berri bat daukagu Racing de Santander taldearen aurka. Nahiz eta urruti bidaiatu behar izan, ziur nago taldeak dena emango duela hiru puntuak Tolosara ekartzeko.
Goazen neskak!