Igandeko 09:45ean elkartu ginen Usabalen, Igorrerantz abiatzeko prest. Autobusa iritsi eta lehenengo sorpresa aurkitu genuen, atzealdean pare bat mahai zeuden. Txokoa aprobetxatuz, taldekide batzuk bidai osoa eman zuten hizketan.
Zelaira iritsi, jantzi, entrenatzailearen hitzaldia entzun eta berotzera atera ginen. Nahiz eta beroketan zehar hamaikakoan aldaketa bat eman, gogotsu atera ginen zelaira. Partidan sartzea kostatu zitzaigun arren, lehen zatia baloiaren jabetzarekin eta sentsazio onekin amaitzea lortu genuen. Nahiz eta bi taldeek markagailua aldatzeko aukerak izan, 0-0eko emaitzarekin amaitu zen lehenengo zatia.
Bigarren zatia hasi bezain laster, talde bizkaitarrak gola sartzea lortu zuen falta baten bitartez. Dena den, ez genuen amore eman eta 65. minutuan Kattalinen gola etorri zen. Nahiz eta nahi genuena baino gehiago sufritzen amaitu partida, merezitako puntua eraman genuen etxera.
Urteko azkeneko partida jokatuko dugu hurrengo astean Logroñes taldearen aurka, etxetik kanpo. Ziur nago taldeak lan handia egingo duela astean zehar 3 puntuak Tolosara ekartzeko.
Goazen neskak!