Astero bezala, gauzak ondo egiteko konpromisoa hartu genuen, guregan eta talde honek guztiontzat duen garrantzian pentsatuz. Eta horrela, denon artean prestatu genuen larunbateko partida, beti ere helburua eta jokoan zegoen guztia kontuan izanda.
Larunbata iritsi eta urduritasunak eta gogoak autobusa bete zuten. Gasteizera janariz beterik joan ginen: bizkotxoak, tortillak, pastak, ogitartekoak… eta partidaren ondoren guztia hiru puntuekin batera jatea espero genuen.
Norgehiagoka hasi zen eta, egia esan, ez zuen itxura ona, bi gol sartu zizkiguten lehen zatian, eta gol bat sartzeko aukera izan genuen arren, gure markagailuak zeroan jarraitzen zuen atsedenaldira iristean. Baina gure taldeak borrokan jarraitu zuen eta bigarren zatian eskuratzeko hain zailak diren hiru gol sartzea lortu genuen. Helenek sartu zituen lehenengo biak eta Lorek partida bukatzear zegoenean garaipena emango zigun hirugarren gola sartu zuen. Partida amaitu zen, eta Maddik berehala hartu zuen mugikorra, egun horretan falta zirenei deitu eta gurekin ospatu ahal izateko.
Orain denok batera lan egitea dagokigu, helburuak lortzeko eta talde gisa hazteko.