Arratiaren aurka jokatzen genuen larunbatean eta beti izaten dira bereziak beraien aurka jokatu behar ditugun partidak, lehenago bai Euskal Ligan eta baita aurreko denboraldian ere izan baikenuen aukera haien aurka jokatzeko. Aspaldiko partez ere autobuseko bidaia izan genuen, nahiz eta segurtasun neurri guztiak betez pixka bat desberdina izan zen.
Partidua ondo joan zen, bagenekien intentsitate handiarekin atera beharko genuela eta horixe egin genuen, partida menpean hartuz. Hala ere, aukerak falta izan ez zitzaizkigun arren, ez zen nahikoa izan golen bat sartzeko eta 0-0ekoarekin bukatu zen. Sentsazio onekin bukatu genuen baina penaz, irabazteko aukera oso gertu ikusi baikenuen. Bukatzeko, berriro autobusera sartzerako ogitartekoak jan eta denboraldiko lehenengo puntuarekin Tolosara abiatu ginen.