Hernio aldera agian? Jendea eta trikitia ez dira faltako bertan. Ibarrako azokan buelta bat? Hondartzara?
Azken egunak aprobetxatu beharko ditugu! Eta zergatik ez Euskal Ligako nesken partida ikustera joan?
Aurreko denboraldian ikuskizun ederra eman zuten eta orain ere bide beretik hasi dute denboraldia.
Harmailetan daude nola ez guraso, lagun eta beste zenbait neska. Goizeko freskotasunik ez dagoen arren, freskotasunez mugitzen dute baloia gure Tolosako neskek.
Elorrio da gaurkoan aurkaria eta badirudi entrenatzaile bat baino gehiago ekarri dutela isildu gabe ari baita gizonezko bat harmailetatik oihuka.
Gure neskek gogotsu heldu diote partidari eta gehienean baloia beraien hanketan egon bada ere, elorriotarrek nahikoa izan dute behin iristearekin, baloia gure sarean sartzeko.
Zero eta bateko emaitzarekin amaitu da lehenengo zatia. Markagailu horrekin joan dira aldageletara, baina tolosarrek ez dute etsitzen eta bigarren zatian ere dena emanaz aritu dira.
Azkenean etorri da gola. Banakoa egin du Bengoetxeak eta gehiagoren bila ibili arren horrela bukatu da gaurkoa.
Irabaztea merezi arren horrelakoa da batzuetan jokoa.
Datorren larunbatean, arratsaldeko bostetan, Beasainen izango da hitzordua, Goiherri-gorri izango da aurkari.
Partida gogorra aurreikusten da baino seguru duten guztia emango dutela.
Etxean ere izango dugu partida gehiago ikusteko aukera eta bete ditzagun aulkiak jendez. Jarri diezaiogun kolorea. Emakumeek ere gozatzen dute kirol honetaz eta gozarazi zalea.
Eskerrik asko neskak. Baduzue kalitatea. Jarraitu ezazue bide beretik eta izan dezazuela zortea.
Arantxa Beain, Tolosa CF, Euskal Liga