Lehen partida etxean jokatu genuen eta lehen zatian ondo lehiatu arren, azkenean amore eman eta 0-3ko emaitzarekin konformatu behar izan genuen. Larunbatean aldiz, itzulerako unea zen eta ba al dago denboraldi eder hau saritu eta borobiltzeko Lezaman jokatzea baino modu hobeagorik?
Denok Usabalen elkartu ondoren, Lezamarantz abiatu ginen. Oraingo honetan, nabari zen azterketak gerturatzen ari zirela eta horren isla jendearen liburu eta apunteak ziren, autobusean zerbait ikasiko zutela edo mirariren bat agertuko zitzaielakoan.
Partidari dagokionez, beraiek jokoan gailendu zitzaizkigun baina guk presioa ondo eginez gure gol-aukerak ere eduki genituen, baina, ez genuen zorterik izan baloia sareratzeko orduan. Bukaeran, 1-0ko emaitzarekin amaitu zen partida eta gure joko eta eman genuen itxura ona ospatu genuen, gurasoen txalo artean.
Nork esan du hasiera batean brometan hasi ginen leloa, egi bihurtu ez daitekeenik? #tolosakoparenbila