[GUTUNA] Esker gutuna, guraso elkartearen izenean

Erabiltzailearen aurpegia Zizurkilgo Ombu guraso elkartea 2017ko eka. 13a, 15:26

"Bazen behin, Aiztondo bailarako bailaran Zizurkil izeneko herrixka bat. Bertan ametsak egi bihurtzen ziren eskola bat zegoen, P.M. Otaño izenekoa eta urtero ekainaren bigarren larunbatean ikasturte amaierako festa ospatzen zuten…".

Horrelaxe hasiera eman diogu aurtengo festari, ipuin batean bezala eta ipuinak kontatuz.

Suziriak airera, erraldoiak eta buruhandiak dantzan eta musika gelan lasaixeago egon nahi zutenekin ipuin kontalaria. Konturatzerako ikasleak oholtza gainera igotzeko garaia iritsi da. Ondo merezitako txalo zaparrada ederra jaso dute guztiek. Tartean izaten diren une hunkigarrien artean, aurten Mikel Tejeriari egin zaion omenaldia aipatu behar. Eskola kirolarekin batera, Mikelek 25 urte bete ditu gurekin. 25 belaunaldi, ikasturtez ikasturte, inongo bereizketarik gabe, kirolaz gozatzeko aukera emanez.

Beste belaunaldi bat agurtu dugu, malko gazi-gozoak tartean eta hurrengo ikasturtean 2 urteko gelan gurekin izango direnak ere festara gerturatu dira. Beraien ibilbide berrian hoberena opa diegu guztiei.

Eta giro ezin hobean pasa dugu eguna: bazkaria, puzgarriak eta jolasak, eskulan tailerrak… gure festan ezinbestekoak bihurtutakoak. Irakasleak eta gurasoak hortxe egon dira, egun hau biribila izateko ilusioz lan egiten. Ez genuen besterik espero. Bejondeizuela denoi!!

Eta festa aurrera ateratzeko, beti bezala, modu batera edo bestera lagundu digutenak aipatu nahiko genituzke: Comercial Urraki, Garazi Loradenda, Joxean harategia, Edurne fruta-denda, Ogi-zuri okindegia, Itsaso zentroa eta Olatz Arregi kinesologoa, Egarri taberna, Bordatxo edaritegia, Argi karrozeriak, Dia supermerkatua, Zizurkilgo Udala, erraldoiak, buruhandiak eta trikitilariak… eta zu zeu, lagundu badiguzu eta hemen aipatu ez bazaitugu ere.

Beste ikasturte bat, beste uda bat… iraila arte batzuei, ondo bizi besteei. Polita izan da elkarrekin lan egitea.

Zizurkilgo Ombu guraso elkartea

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!