Ez dizu bereziki irrika handirik egiten egunak, baina azken urteotan nabaritu duzu ahalegin berezia ohiko mozorroetatik harago tradizioari begiratzeko, behin gurea izandako usadioa atzera ere errekuperatzeko.
Albistegiek aurreratu dizute gaur-biharretan hildakoen eguna ospatuko dutela munduko hainbat txokotan. Aspalditik zaude jabetuta gurean nahiko lan dugula duintasunez hiltzen diren horiek ere naturaltasunez oroitzeko; ez duzu pentsatu ere egin nahi ia senide guztiak bortizki galdu dituzten horiek nola demontre egingo duten dolua. Nola agurtuko dituzten lurperatzeko gorpurik ere ez baldin badute. Oraindik negarrik geratzen zaien, edo amorruak bizitzen uzten dien.
Lur mortua da orain Gaza, badakizu ez dutela denbora gutxi beharko hauts tartetik berriz ernaltzeko.
«Truko edo trato esanez joko dizute etxeko txirrina. Eta hobeto ezin ekarria irudi zaizu, ondo asko borobiltzen baitu bi urteotako joko maltzurrak berriki izan duen emaitza»
Bien bitartean, truko edo trato esanez joko dizute etxeko txirrina zenbait gaztetxok. Eta hobeto ezin ekarria iruditu zaizu esamoldea bera, ondo asko borobiltzen baitu bi urteotako joko maltzurrak berriki izan duen emaitza: jakin nahi zenuke zer truko klase darabilten esku artean batzuek, auskalo zein interesen truke.