Derrepente izan da, urtero bezala. Derrepente jarri dituzte argiak kaleetan, eta derrepente agertu dira turroiak eta mazapanak dendetako erakusleihoetan eta apaletan. Egun batetik bestera konturatu naiz Gabonen atarian gaudela, dagoeneko. Eta Eguberrien ateetara iristearekin batera, beste ate batzuk noiz zabalduko irrikaz nago. Izan ere, abenduaren 5etik 8ra ospatuko da aurtengo Durangoko Liburu eta Disko Azoka, euskal kultura maite dugunon urteroko zita. Nik, behintzat, ez dut huts egingo. Gogoratzen dut txikitan, gozo-dendetako erakusleihoetan bezala, zein liburu eta zein disko hautatu jakin ezinik ibiliko naizela, liluratuta. Nobedadeak, herri musika, talde berriak, mahai-inguruak, solasaldiak, hitzaldiak, antzerkiak, kontzertuak… Denetik eskaintzen baitu Azokak, 48 urtek emandako esperientzia zabala baliatuta.
Erraz esaten da, baina jende askoren lana dago urte horien guztien atzean.
Aurten gainera, eskaintza nagusienetakoa musika izango dela azpimarratu dute antolatzaileek, hainbat estilotako talde eta bakarlariak egongo direlako.
Aipatu, etxeko txikientzat ere eskaintza zabala eskainiko duela.
Plan polita izaten da urteroko hau, nire kasuan behintzat. Goizean nobedadeez gozatu, liburu eta disko interesgarriak usaindu, ikusi, erosi…, ondoren Ahotsenera sartu, taldeen kontzertuak entzun, tartean antzerkiren bat badago hori ikusi, eta azkenik Durangoko alde zaharrean poteatzen ibili.
Beraz, euskaltzale guztiak animatu nahi ditut hutsik egin gabe Durangora joatera, merezi duelako, merezi dugulako!
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
