Gaur egungo aurrerapenekin zein da eskela baten funtzioa? Gaur egun zein da inguruko hilberriaren berri eskela bitartez enteratzen dena? Eskelak beharrezkoak dira? Zergatik kontatzen ditugu hilberriari zenbat eskela eskaini dizkioten? Egunkarian zenbat eta eskela gehiago izan orduan eta maitatuagoa izan ote da hilberria?
Askotan hitz egin gabe uzten diren kontuak izaten dira baina hil eta ondorengo gure erritoak ondo azaltzeak zalantza bat baino gehiago uxatu ditzake. Eskelen kontua da horietako bat. Behin hil behar eta zein egunkaritan erabakitzea polita da, ni ATARIA-n azalduz gero gustura nintzateke.
BERTSO JARRIAK
Doinua: Jardin bat zuretzat
1. Arduratuta nago
nere kolpeekin,
hil eta ondorengo
eginkizunekin.
Amets gaiztoak dauzkat
gauero nerekin,
ezin begirik bildu
bart gauekoakin,
Diario Vasco-ko
eskela batekin.
2. Etxean bazkaritan
esan nun barkatu,
pentsatzen jardun naiz ta
apunteak hartu,
behin izango da eta
nahiz gazte akatu,
Diarion eskelaik
ez dezagun patu,
nahiago det atxurra
lepatzean sartu!
3. Nahiz ta debalde ere
ez nuen espero,
diarion eskela
700 bat euro,
bertso luze bat edo
bi esaldi bero,
konformantzen nintzela
esan nien gero,
Ataria-n 20 bat
eskaini ez gero!
4.Gorpua nahi nuela
etxean jartzea,
eliza leporaino
zibil omentzea,
hautsak astindu eta
pagon bat sartzea,
beatziurrenean
guztiak batzea,
hori da hil da ere
adarra jotzea!
5. Gure beldur ta bromak
gure salatari,
norbere eskelari
alperrik kantari,
ikusi nahita ere
ezin dugunari,
hobe eskerrak eman
alboan denari,
laguntza emateko
prest dagoenari.
6. Bizirik gaude eta
hau ez da itxura,
biharko ezin utzi
gaurko abentura,
ospatu behar degu
eskutik eskura,
lagunarte onean
behar den modura,
afari on batekin
ta nere kontura!