Entzuleriak oro har pasodoble hitza entzutean, zezenen munduarekin lotzen du zuzenean. Eta egia da baduela zerikusia. Izan ere gehien ezagutzen ditugun pasodobleak zezenketetan jotakoak dira, hauetako asko zezen munduan garrantzitsuak izan diren toreatzaileei eskainitakoak gainera. Orain dela urte batzuk, Tolosako Musika Bandak ere herriko zezen plazan izaten ziren zezenketetan jotzen zituen abesti hauek.
Oraingoan musika genero hau kalera ateratzea pentsatu dugu, inguratuko den jende guztiak entzuteko eta gozatzeko aukera izan dezan. Musika genero zabala denez, mota askotakoak entzungo ditugu. Adibidez, kalejira kutsua dutenak.
Izan ere, pasodoblearen jatorria kalejiretan dago berez. Arrazoi honengatik, mota honetako asko daude. Baina ez dira zezenketa eta kalejira saileko pasodobleak Bandak Berdura plazan eskainiko dituen bakarrak. Beste hauek ere egongo dira egitarauan: dantzarako sortutakoak, kontzertu estilokoak...
Ikus daitekeen bezala, aukera aparta eskaintzen digu Musika Bandak ostiral arratsalderako. Gonbidatuta zaudete denok herriko Musika Bandak eskainiko duen emanaldi berezi honetaz gozatzera. Hurbildu zaitezte, elkarrekin une paregabea igaroko dugu eta!