Bigarrena Euskal Herritik, etxe ondotik. Derrigorrezkoa omen da haurrek idazten dutena lotuta idaztea. Eskolaren batean, esan didatenez gutxienez, hala agintzen omen dute ikasleak 8-9 urte egin artean. Eta hau, ume askorentzat zailagoa dela jakinik, irakurtzeko zailagoa den letra egiten dutela oharturik eta testu labur bat idazteko denbora gehiago beharko dutela aurreikusirik. Ez dauka zentzurik.
Bi pasarteek halako kontraesan bat daukatela dirudien arren, biak bide berdinean doazela uste dut nik. Argitu egingo dut esan nahi dudana.
Eskuz idaztea garrantzitsua da, beharrezkoa, oraindik behintzat. Hori gutxi balitz, ikerketa ugarik erakutsi dute inteligentziarentzat ere onura asko dakartzala ariketa honek. Baina, kasu honetan, soilik eskuz idazteari buruz ari gara, ez lotuta ala aparte idazteari buruz. Izan ere, ba al du garrantzirik lotuta edo aparte idazteak idatzitakoa ulertzen denean? Eskolan arautu beharreko zerbait al da? Beste gai askotan bezalaxe, zentzuz jokatzea izango da garrantzitsuena. Haur batek hizkiak lotuta idatziz irakurtzeko moduko zerbait sortzen badu idatz dezala lotuta. Beste batek gauza bera hizkiak aparte idatziz lortzen badu, idatz dezala aparte. Baina, ez ditzagun eskoletan absurdora iristen diren arau aldrebes gehiago asmatu, ez baita hori geure helburua.