Herririk txikienetan, ordea, altxor berezi bat bada. Guztion artean egiten duguna eta oso geure egin dezakeguna, bigarren etxe moduan senti dezakeguna, gizarteari bizitza ematen diona, eta batez ere, bertan bizi garenok baloratzen jakin behar duguna, maitatu behar duguna: eskola.
Indar berezia du eskolak herri eta auzorik txikienetan. Bereziki, herritarren elkargune nagusienetako izatera iristen delako eta horrekin batera herriaren biziraupena bermatzen laguntzen duelako. Baina, ez hori bakarrik. Herririk txikienetako eskolarik txikienetan belaunaldien arteko loturak indartu egiten dira, gizarte taldeen aniztasuna aberastu egiten da eta herriaren izaera birsortu eta berrasmatu egiten da, tokiko eta momentuko beharretara egokitutako herri berriak eratuz. Urtez urte, hamarkadaz hamarkada…
Hori dela eta, igande honetan Gabirian elkartuko gara Gipuzkoako Eskola Txikien Festan herri eta auzo txikiak bizirik mantentzeko Eskola Txikiak behar ditugula pentsatzen dugunok, bizirik gaudelako eta horrela jarraitu nahi dugulako:
Eskola txikiak,
herri eta auzo
geroaren bila
pausorikan pauso…