Lehen faseak izandako arrakasta ikusirik, kirol kluben desafioaren bigarren fasea abiatu da asteon. Lurraldeko zortzi klubek esku hartu zuten lehen errondan: Sanlo (eskubaloia), Mariño-Real Union (futbola), Tolosa (eskubaloia), Soraluze (futbola), Aiztondo (boleibola), Mondragon (futbola), BKL Beasain (saskibaloia) eta Iraurgi ISB (saskibaloia). Planteatu ziren hiru jokoen artean sailkapena zeukaten ‘galdetegi azkarrak’ eta ‘abilezia jokoak’ irabazle bera izan dute: Domusa Teknik ISB saskibaloi taldea.
Orain arteko dinamika jarraituz, astero lurraldeko talde berri bat sartuko da jokoan. Asteartetan galdetegi azkarra, asteazkenetan abilezia jokoa eta ostegunetan galdera kateatuak erakutsiko dira. Orain gainera, ostiraletan, sailkapenaren errepaso bat ere egingo da. Eduki guztiak Matx.eus sare sozialean ikus daitezke.
Jolastuz, komunitatea sortu
Sailkapenaz harago, lurraldeko kirol klub ezberdinen arteko komunitatea josteko helburuz jarri zen martxan kirol kluben Matx desafioa. Modalitate ezberdinak elkartuz, kirola eta euskara erdigunean jarriz, interes komuneko gaiak modu erakargarri batean jorratu daitezkeela erakutsiz.
Desafio irekia
Desafio hauetan esku hartu nahi duen klub edo taldeak aukera izango du joko dibertigarri hauetan aritzeko. Horretarako sare sozialean izena eman eta email bat bidali beharko du matx@matx.eus helbidera erronkan sartu nahi duela adieraziz.