Gure hiria marraztu behar bagenu, orri zuriaren gainean, promesetatik haratago, pentsatu al dugu inoiz nolakoa izatea gustatuko litzaigukeen? Calvinoren Hiri Ikusezinen parekoa litzateke akaso: hariz osaturiko hiria, egunero atzoko errautsetatik jaiotzen dena edo diamantez eginiko gazteluak dituena. Baina guk ez dugu orri zuririk, ez aukerarik Isaura, Dorotea edo Ersilia bezalako hiriak sortzeko. Guk Tolosa, Altzo, Zizurkil edo Ikaztegieta ditugu, eta hirigintza, hirien egintza, ditugun herriak eraldatzea, bizitzea da.
Gure hiria marraztu behar bagenu, ez orri zuriaren gainean, daukagunetik abiatuta baizik, hiri solidarioa, parte-hartzailea, anitza, ekologikoa, sortzailea eraiki, egin, sortu, altxa, marraztuko genuke. Egunotan promes egin diguten bezala.
Promesak hanka motza omen du, ordea.
Parte-hartzea bezalako hitzez betetzen zaigu ahoa. Parte-hartzea lau urtean behin udal ordezkariak hautatzea baino gehiago dela denok ados, baina zail egiten da teoriatik praktikarako bidea. Borondate falta batzuetan, eta borondatea denean ere herritarroi parte-hartze kultura falta zaigu. Sinestea gure iritzia garrantzitsua dela eta herri bateko erabakien zama gure gain hartzea.
Igandean bozka ematera joatea tokatuko zaigu. Ez al zaie ahaztuko gure ordezkariei datozen lau urtetan hiria gurekin batera marraztu, altxa, egin, eraiki beharko dutela!
Egin. Ekin. Marraztu. Hazi. Altxa. Eraiki. Lan egin. Sortu. Bildu. Erabaki. Irabazi. Bozkatu. Aditzez bete zaizkigu postontziak, kale eta plazak. Berria. Bestelakoa. Hobea. Aldaketa. Promesez irrati-telebistak.
Ez diogu hau kapritxo hutsagatik: lagundu iezaguzu. Eduki hau guztia doan ikusten duzu ez dugulako irudikatzen euskarazko hitzik gabeko Tolosalderik. Atarikide, iragarle eta erakunde askoren laguntzarik gabe ezinezkoa litzateke. Zenbat eta komunitate handiagoa sortu, orduan eta sendoagoa izango da ATARIA: zurekin, zuekin. Ez utzi biharko gaur egin dezakezuna: egin zaitez Atarikide!
EGIN ATARIKIDE!