Ene, ez nuen inoiz pentsatuko paper eta tramite kontuekin eroa bezala bueltaka horrenbeste denbora pasako nuenik! Joan bankura A paperaren bila, hartu hitzordua B erakundeko bulegoan, eskatu C zigilua udaletxean, deskargatu D dokumentua Batekdaki.eus web-orritik, instalatu E programa artxiboa irekitzeko, ikusi F tutoriala funtzionamendua ulertzeko, gorde G kodea, sartu kodea H aplikazioan, eta amaitzeko, bidali hori guztia I pertsonari. Hortxe joan zaizu goiza, eta zorte pixka batekin erantzun automatiko bat besterik ez duzu jasoko.
Gogoan dut umea nintzela ama noizean behin sukaldean paper tartean ikustea, baina gaur egungo egoerak, ordea, itxura desberdina duela iruditzen zait. Digitalizazioak abantaila asko ekarri dizkigun arren, esango nuke geure buruaren arduradun bakartzat utzi gaituela nolabait. Ez naiz autonomoa, halere, gestoria txiki bat kudeatzen dudalako sentsazioa izaten dut batzuetan, hortxe ibiltzen bainaiz burua galdu beharrean diren eta ez diren tramite guztiak egiten. Noski, horrek mila kezka sortzen dizkit: «Ai ama, gaur zen eskaera egiteko azken eguna», «ai ama, ez nion e-mailari erantzun», «ai ama, non utziko nuen ziurtagiria» edo «ai ama, katuak sofa azpira bota duen USB horretantxe zegoen ikaragarri garrantzitsua zen dokumentu hura».
«Digitalizazioak abantaila asko ekarri dizkigun arren, esango nuke geure buruaren arduradun bakartzat utzi gaituela nolabait»
Gutxi-asko denok ditugu antolatu eta egin beharreko kontuak, baina nola deitzen zaio norberaren bizitza kudeatzearen jardunari? Niri behintzat gehiegi luzatzen zaizkit azalpenak, eta batera eta bestera edo ordenagailu aurrean mila konturekin pasatzen dudan tartea ere nolabait azaldu behar dut. Horregatik, aurrekoan lagun batek zertan nenbilen galdetutakoan, hala esan nion: «Sentitzen dinat, baina oso lanpetuta nagon Maddi SL kudeatzen, deituidan geroxeago».