Anoetan azken ehun urteetan izan diren gertakari txiki eta handi horiekin josi dugu, aurten, Anitz dantza taldearen gaur zortziko ikuskizuna. Kaleen oihartzuna izena jarri diogu emanaldiari, eta ez da ausazko hautua. Interpretatuko ditugun gertakarietako batzuk liburuetan bilduak baitira, ikus-entzunezko euskarrietan ere bai, argazkietan; beste batzuk, berriz, hezur-haragitan bizitako pasadizoak dira, herrian baino ezagutzen ez direnak. Guztiak, ordea, iritsi zaizkigu, letraz edo irudiz ez bada, ahoz aho, eta oraindik ere gogoratzen ditugu batzuk, gertatu izan zirenean bertan izan ginelako, edo norbaitek kontatzen jarraitzen duelako; gertakari eta pasadizo horien oihartzuna entzun daitekeelako oraindik Anoetako kaleetan.
«Anoetan azken ehun urteetan izan diren gertakari txiki eta handi horiekin josi dugu, aurten, Anitz dantza taldearen gaur zortziko ikuskizuna»
Oihartzun horrek jarrai dezan, gorputzarekin kontatuko ditugu guztiak, gorputz hizkuntzaren bitartez, gorputz euskararen bitartez. Berrogeita hamar dantzari baino gehiago igoko gara oholtzara, Anitz dantza taldeko kideok, eta gurekin izango dira Loatzo musika eskolako musikariak, abeslariak, Kukuak Kantuz abesbatza eta aurkezleak.
Ikusleak ere parte-hartzaile bilakatu nahi ditugu aurtengo emanaldian. Jolas bat proposatuko diegu, dantzaren eta musikaren bitartez idatziko dugun Historia liburu honetan bete ditzaten hutsik utzi ditugun lerroak.
Ostiral gauez izango da, maiatzaren 29an, 22:30ean, kiroldegian. Esan gabe doa, guztiak gonbidatuta zaudete ikuskizunera.