Askorentzat Euskal Herrian izan den pop musika talde onenetarikoa zen, baina sekula ez zuen lortu jendetza erakartzea euren kontzertuetara. 800 laguneko edukiera handiegia izan zitekeela uste zuten, eta urtarrilaren 16koa proiektu handi bat zen, bai artistikoki, baita ekonomikoki ere. Horregatik, ez dakit konbentzitu ote genituen, kezka alboratu ote zuten, loa galdu ote zuten gauren batean hori zela eta. Baina iritsi zen urtarrilaren 16a. Jendeak erantzun zion hitzorduari. Aretoa lepo zegoela jo zuen bandak. Handia izan zen! Irudi eta soinuetan grabatuta geratu zen ordukoa.
«Proiektua loratzen hasi zen taberna berean ospatu genuen kontzertu ondorengoa; hura ere bikaina izan zen!»
Proiektua loratzen hasi zen taberna berean ospatu genuen kontzertu ondorengoa; hura ere bikaina izan zen!
Hamazazpi urte igaro dira kasik kontatu dizuedan pasadizo hartatik. Egunotan, berriz, ikusi ahal izan dugu ordu gutxiren bueltan Euskal Herriko musika talde batek ia 80.000 sarrera saldu dituela Bilbon eskainiko dituen bi kontzertutarako. Taldeak lan handia izango du, heldu den urteko ekainera bitartean, bi emanaldiok prestatzeko, baina ez du kezkatu beharrik izango jendeak erantzungo duen.
Zetak taldearenak gogorarazi dit ordukoa, eta berreskuratu dut, kamino bazterrean topatutako harri bitxi bat nola.