Ehun urtez behin pandemia handi bat jazo izan dela entzun dugu azken bi urteotan, COVIDaren eraginez bizi izan dugun azkenekoaz mintzatu izan garenean. Egia da, bai, ehun urteko epean izan diren gainerakoak kentzen baditugu; errealitateak ez dezala titular on bat izorra. Espainiar gripea Ameriketako Estatu Batuetan sortu zen eta mundu zabalean hedatu. Europa gerran zegoen eta 1918 hartan, eta zentsuraren ondorioz ez zen berria hedatu gerran ziren herrialdeetan; Espainia gerratik at zegoenez, zentsurarik ez zen aplikatu, eta bertako hedabideek gainerako Europakoek ez bezala titular ugari eman zituztenez, ustea zabaldu zen Espainian bakarrik zegoela gaitza; titular batek ez dezala errealitatea erakuts.
Egia erdiak eta gezurrak gorabehera, pandemiak, gerrak, eta krisiak (ekonomikoak, demografikoak, ekologikoak…) eskutik datoz, batek dakartza besteak; ergatiboa nork daraman ez du axolarik.
Pandemiaren izugarrikeriek, gerraren izugarrikeriak ekarri ditu, eta energia krisia, eta krisi ekonomikoa, eta ekologikoa… lehendik ere bazeuden, baina biderkatuta datoz. Bizitzaren garestitzea eta soldaten apaltzea. Aire girotua 27 gradutan eta berogailuak 19tan, gutxienez eta gehienez. Gauak ilunago. Uda lehor honek negu gorria dakarkigu. Shock doktrina aplikatzeko une ezin hobea.
«Abiatu gara beste behin, datorrenari aurre egiteko gai izango garen jakin gabe. [...] 'Panem et circenses'. Menua askotarikoa eta zabala dugu»
Iraila etorri zaigu, ikasturte berri bat abiatu dugu. Oporrak ahitu. Abiatu gara beste behin, datorrenari aurre egiteko gai izango garen jakin gabe. Norberak aukera beza zerk ahantzaraziko dion, une batez bederen, berri txarrek (azken asteetako erauntsi bakarrek) eragindako egonezina. Panem et circenses. Menua askotarikoa eta zabala dugu.
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!
