Begiak, beste batzuetan, zutabeen antzekoak dira;
hareago, harkaitz edo megalitoen antzekoak.
Hesi huts.
Beste batzuetan, begiak orratzen antzekoak izaten dira;
zulatu egiten zaituzte; edo zauritu, edo suspertu,
ziztadaz ziztada.
Begiak eskuen antzekoak ere izan daitezke;
eutsi egiten dizute, edo bultzatu, edo babestu, edo zaindu.
Aldi berean, helduleku dira.
Begiak eskandalizatzen bazaitu,
erauz ezazu, dio Bibliak.
Baina, beharbada, hobe duzu,
begiak eskandalizatzen bazaitu,
garuna erauztea;
ez da begia eskandalizatzen zaituena,
ikusitakoa gaitzesten duen burua baizik,
aurreiritziz betea.