Duela 90 urte, 1934ko udan, Ski Club Tolosanoko kideak ez zeuden oporretarako, lanerako baizik. Candanchuko (Huesca) lehen hotela eraikitzen ari ziren aurreko urtetik, 1933ko uztailaren 25ean jarri baitzuten lehen harria. Argazkian ikus daitezke proiektuaren bultzatzaileak kanpin dendetan, eta egun hauetan hotela jabez aldatu dela jakin da.
Tolosarrak, norvegiarren eraginez, eskian aitzindariak izan ziren eta 1909an Ski Club Tolosano sortu zen. Aralartik Pirinioetara pasatu ziren. 1928an Candanchun bazen eski estazioa, baina erremonterik ez. Bertan hotela eraikitzeko abenturan murgildu ziren. 1934ko abenduaren 8an inauguratu zen. Estatuko lehen eski hotela izan zen eta urte askotan zehar bakarra. Antonio Juantegi bazkidea zen arduraduna, Donostiako Biarritz eta Niza hotelen jabea. Asteburuetan Donostia-Tolosa-Jaca autobusa eta Hendaia-Pabe-Canfranc trena jartzea ere lortu zuten.
Inbertsio handia eskatu zuen eta finantza arazoak izan zituen Ski Club Tolosanok. 1936ko Gerra iristearekin arazoak areagotu egin ziren eta 1940ean elkarteak zazpi bazkideri saldu zion, Bernardo Beristain eta Maria Arzak bikoteak hartuz ardura. Horiek 1981ean Javier eta Alfredo Landa anaia nafarrei (zuzendaria zen Javier 1978tik) pasatu zieten eta orain, jubilatu direnean, hauek Snö hotel kateari.
