Ezkurdiak eta Barriolak partida honetan garbi zituzten gauzak: irabazi ala irabazi. Eta halaxe alde egin zuten markagailuan: 8-1. Baina zizti-zazta axeri amezketarra hasi zen berean, markagailua parean jartzeraino. Axerietan axeriena dugu txikia. Artekarien begirada du Altunak: eskuinera begiratu eta ezkerrekoa ikusten du, begiradarekin atzera esan eta pilota aurrean mimatzen.
Hala ere, akatsak egin zituzten bi aurrelariek, nahiz eta saio polita borobildu zaleen gozamenerako, partida txukuna eta gogorra, 735 pilotakadekin. Altunak galdu egin zuen, baina amezketar pilotazale batek esan zigun bezala, “lasai, mutil honekin ez dao kuidadoik”. Partida honetan garaile bakarra izan zen nabarmen, Barriola xaharra. Bazuen publiko eta kritiken aurrean bere burua aldarrikatzeko gogoa, edota atzo ikusi genuen bezala, bere kontratua zintzilik zegoen ari batetik, agian. Barriolak frontoian hitz egin zuen, lanean fin eta dena bi txapen artean jarriaz. Eta garaipena altutik ospatu zuen, “hau poza! Urte bat gehiagorako kontratua” esanez bezala.
Badakizu, urte berriarekin kotxeko edo etxeko asegurua aldatu nahi baduzu, ez izan zalantzarik: Barriola Aseguruak.