Gaurkoan, zeruari begira hasi dute eguna Elbarrenako festetan. Goizean, dianak, hamaiketakoak, euskal dantzen saioak eta jubilatuen jolasek eta bazkariak hartu dute protagonismoa. Arratsaldean, berriz, etxeko txikienek izan dute gozatzeko aukera. Erraldoiekin saltoka aritu eta buruhandien aurretik lasterka joateko. Bitartean, IX. Joxe Arregi mus txapelketa jokatu da, eta ondoren, BocaBeats bikotearen umore saioa ikusteko aukera izan dute bertaratu direnek.
Mus txapelketa, Joxe Arregi plazan izan da, eta bertan, 40 bikote inguru jardun dira txapel eta garaikurren lehian. Buruhandi eta erraldoien topaketan, bestalde, herrikoez gain, Usurbilgo, Añorgako eta Amasa-Villabonakoek ere hartu dute parte, plazan bertan hasi den kalejiran. Gauean amaituko dira festak, 22:15ean hasiko den melokotoiaren hileta eta lur-ematearekin. Ondoren, melokotoi sariak banatuko dituzte.