[Zia edo Boga] '8ak 1'

Batetik, Aquarim inguruan beti izaten delako, estropadaz baino, spoilerrak –pronostiko propioak, alegia– ahots goraz eginez gozatzen duen zalerik. Noski, nolabait demostratu beharra dago, egun eta leku horretara bat ez dela kasualitatez iritsi, lehorreko-domingero-probintziano-ezjakinak bezala. Bestetik, Kontxako kanporaketan tradizio bilakatu da, jada, sailkapena hasterako sailkatuta dagoen talde horren kamixetak nonahi ikustea, donostiar arraun zaleen eszisioak eszisio.

Egiazki, Kontxak zazpi erreinuek baino fikzio gehiagorako ematen du, baina, atzokoa kapitulu bat errepikatuta ikustearen parekoa izan zen. Iazko traineru berberak gizonezkoetan, eta faboritoak faboritoago emakumeetan. Eskerrak, Mecoseko galiziarrak Lannisterrarena egitera ausartu ziren: espero gabeko erasoa.

Igandean estreinatuko dute kapitulu berria, eta bakoitzak ikusiko du, spoilerrak irakurrita joan edo ez. Arraun ikuskizunak, etorkizun bakarra du: 8ak 1.