'Souvenirrak'

Erabiltzailearen aurpegia

Urteen joan-etorriak ez die souvenirren zerrenda kuttunenei eragiten eta, oraindik ere, Benidorm-en erositako palak edo Tenerife idatzirik duen gosaritarako katiluak aukeratuko lituzkete turista askok; badira, ordea, oso bestelako souvenirrak. Irlandako gaelikoa izan liteke bat, aditu zenbaiten testuak irakurriz gero: gizakien arteko komunikazioa ahalbidetzeko baino, bisitarien oporraldiei benetakotasuna emateko tresna da, gaur egun, hizkuntza indoeuroparra.

Baina, sartu al liteke tostako arrauna souvenirren zaku berean? Igandeko hitzorduari arreta gehiegirik gabe erreparatuta ere, erantzun liteke galdera: bai, noski. Ez baita kasualitatea, San Miguel ligako lehen estropada Guadalquivir ibaiko ur zabaletan jokatzea. Euskal Herria eta Sevilla, aupa eta olé, zu iparraldera eta ni hegoaldera, han behean ederki bizi dira-eta.

Egia da, ez da nobedadea TKEko zuzendaritzak eta agintari politikoen sustapen asmoek bat egin izana, palada arteko lehia promoziorako baliatuz. Arraunari souvenir kutsua emanez, akaso; kirola baino, folklorea salduz, beharbada. Ez baita praktikotasunaren eredu, gutxien-gutxienez 168 kirolarik 900 kilometro egin behar izatea, hilabetetan zaildutako entrenamenduak uretaratzeko.

Dena ez da kritika izango, ordea, eta liga Andaluzia aldean ekiteak tostako arrauna eliteko kirol gisa ezagutarazteko bideak zabal ditzake, jakina. Antza denez, ordea, emakumeek oraindik ez dute nahikoa meritu bildu aupa neskak entzuteaz gain, olé chicas entzun ahal izateko; lehengo lepotik burua.
Aitortzen dut, tostako denboraldiaren prebia batek pronostikotik gehiago beharko lukeela izan akaso, baina, ligako ontzi zenbaitek ere lehengo lepotik burua, eta berdez eta urdinez datoz egunkarietako lerro-buruak. Iraileko balantzeetan balkoi eta leihoetako bandera kopuruak eraginik izango balu zoriontsu nintzateke zinez, baina, nago, horrek ere askotxo duela folkloretik. Aupa bezain ongietorriak izango dira, beraz, olé dioten animoak.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!