Guztiak izan daitezke artikulu baterako gai posibleak, guztiek eman dezakete zeresana bai eta piztu ere eztabaida.
Horretan aritu baino, dena den, gera gaitezke hausnarrean, gure kolkorako, nork bere prismaren araberako irakurketarekin.
Nik ez dut ulertzen nolatan ez dion PPk ardura politikorik zein ardura pertsonalik eskatzen gezurtiari; ez dut ulertzen nolatan ospatu dezakeen Aberri Eguna ikurrinik gabe alderdi abertzaleak; nolatan lortzen duen ustezko justiziak, Altsasuko auziarekin halako espetxe-zigorren bueltan aritzeko ausardia, beste asko eta askori inolako zigorrik ezartzen ez zaienean; nolatan iritsi gaitezkeen Siriako zein beste ertz bateko irudia aurrean dugula gure pintxoaz gozatzen jarraitzera; orrialdeak aurrera-atzera, nola iritsi garen denetarikoak digeritzeko gai izatera.
Beno, agian iritsi naiz ulertzera, maiztasunak egiten baitu edozer gauza arrunt.
Asteotan denetarikoak izan ditugu: gezurretako tituluak, lotsagabekeriak, Siriako irudi gogorrak, penalti edo ez-penalti baten bidezko garaipena, santurik gabeko Aste Santua, ikurrinik gabeko Aberri Egunak, injustiziaren haserreak piztutako aldarri isilak,...
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!