Etengabeko aldaketen lasterketan murgildurik gaude. Gauza asko eta asko aldatuz doaz denborarekin,eta zer esanik ez teknologiaren urrezko aro honetan. Hala, telefonotik egin ditzakegu erosketak, musika entzun, hitz baten esanahia aurkitu, irakurri, … eta seguruenera batek baino gehiagok Olentzerori whatsapp bat bidaliko zion zer desio zuen esateko. Pentsa, zenbateraino aldatu diren gauzak denbora laburrean!
Bai, aldaketak, aurrerapenak, baina badira aldatzen ez diren gauza asko eta asko ere.
Esaterako, badira zenbait familia, ez urte amaieran ez urte hasieran, ez Olentzeroren ez eta Errege Magoen oparirik jaso ez dutenak. Horien egoera ez da aspaldi aldatu, eta familia horiexek dira eta ziren iaz nahiz duela bi, hiru, urte «aldatzen ez diren Gabonetako protagonista». Ez daude urrun, hurbilekoak dira, bizilagun akaso.
Txiroa beti baita txiro. Eta aberatsa? Ez. Txiroaren egoerak ez du aldaketarik izango ziurrenik, baina aberatsarenak seguruenera bai, orduan eta aberatsagoa izateko parada izango du.
Argi da, «dena aldatu da» esatea egiari gezurra eranstea dela. Ez baita guztia aldatzen, ez dugu guztia aldatzen.