[Aulkitik] Nahi baina ezin

Igande arratsaldean elkartu ginen Usabalen. Nabaria zen gutako bakoitzak zuen urduritasun puntu hori ordubete barru genuen norgehiagoka zela eta, beraz, kotxeak hartu eta Oiartzunerantz abiatu ginen. Oraingoan, tamalez, taldekide batzuk lesionaturik eta besteren bat kanpora joanda zenez, jubenilen taldeko Amaia, Eneritz eta Saioarekin jolasteko plazer hori ere izan genuen. Aldatu orduko, gure entrenatzailearen hitzak entzun eta gogoz irten ginen zelaira gure taldeak dakien onena ematera.

Esan beharra dago, partidaren emaitza ez zela guk nahi izan genuen bezalakoa izan. Lehenengo zatian, Oiartzunen erasoak kontrolpean izan genituen, ekipoa ondo antolatuta jarri genuenez oso zaila egin zitzaien gola sartzea. Baina, 45. minutuan gelditzea ezinezkoa izan zen korner batetik, bat eta hutseko emaitza lortu zuten. Bigarren zatian berriz, aldrebestu egin zen partida, beraiek indartsuago bihurtu eta gol gehiago sartu zizkiguten. 

Nahiz eta partida galdu, taldeaz harro itzuli ginen etxera, Oiartzuni partida zaila jarri eta Tolosa ez dela edozein talde erakutsi eta gero. Hurrengo asteko norgehiagoka oraindik eta gogotsuago hartuko dugu, eta ziur nago ligari izugarrizko bira emango diogula.