Joan den larunbatean lortutako aldeko emaitzen laguntza izango dute altzotarrek, hirutik bi partida irabaztea lortu zuten-eta. Bi taldeek joaneko bikote berak plazaratuko dituzte -Zubeldia-Olano vs Lasa-Etxeberria kadetetan, Zubeldia-Aizpitarte vs Alberdi-Arrate jubeniletan, eta Murua-Mujika vs Labaka-Arregi nagusitan- eta, joaneko partidetan ikusitakoak ikusirik, kanporaketa lehiatua eta estua iragartzen da.
Altzotarrena da abantaila oraingoz, ordea, eta hori berrestera sartuko dira pilotalekuan. Zizurkildarrek, berriz, etxean aritzearen abantaila izango dute, frontoia eta zaleak. Esperientzia gutxi dute altzotarrek Herriartekoan, bigarren parte-hartzea dute aurtengoa, eta izugarria litzateke azken-laurdenetara sailkatzea. Laguntza handia litzateke altzotarren babesa eta, nola ez, guztiak gonbidatuta daude biharko hitzordura. Gogoratu: Zizurkilen, 19:00etan. Merezi du!