Ez du etenik udarako pilotarien jardunak eta Lizarrako txapelketa ostean buruz burukoan, Amezketara begira jarrita daude pilotariak.
Ezin izan zuten txapela ekarri Lizarratik Artolak eta Irazustabarrenak. Eskura izan zuten garaipena, baina azkeneko txanpan hauek gehiago hits egin edo besteek gehiago asmatu, txapeldun-ordetzarekin konformatu behar. Gaizki, oso gaizki hasi ziren eta markagailuak kontrako 11 eta 1 markatzen zuen berehala. Tantoak lehiatuak ziren, baina denek beste aldera joaten ziren. Lan dexentearen ondoren, partida atzean kargatuz berdintzea lortu zuten, eta baita aurretik jarri ere 17-20 irabaziz, baina hortik aurrera kontrarioek, asko asmatuz, joan ziren aurrera eta hogeita bira iritsi.
Orain buruz burukoan ari dira, Amezketan, eta bertan Intxurreko bi pilotari daude jubeniletan lehian, ostiralean, abuztuak 12, Enaitz Aizpitarte altzotarra aterako da Larrunarriko kantxara, Antso naparrari aurre egiteko. Larunbatean berriz Aratz Irazustabarrenaren txanda izango da. Exposito izango du parean, eta hau gainditu beharko du iazko finala errepikatu nahi badu.
