Herriko jaietako egun handia zen Errenterian, eta jende asko inguratu zen finalak ikustera. Aurreko kanporaketetan, finalerdi eta abarretan ere jende dexente ibili da “Agustina Otaola raketista profesionala” izena duen frontoian.
Jaialdiko lehen partida zen jubenilena eta Aratzek atzetik jokatzen zuen. Partida gogorra izan zen, estua azken tantoak iritsi arte. Eta han, Biain-Irazustabarrena bikotea nagusitu zen. Oso ondo aritu ziren biak. Aratzek dominatu zuen gehienetan atzeko koadroetan eta tanto gehiago egin zituen galdu baino. Hutsegite moduan apuntatzeko bizpahiru falta egin bazituen ere, atzealdean dozena erdi bat tanto behartu zituen, horietako hiru pilota erreboteraino sartuz. Aurrealdean bere lagunak Biainek, partidu bikaina egin zuen, lanean aritu behar zenean lanean eta aukera zegoenean tantoa bukatzera joanda. Bolea izugarria erakutsi zuen, eta horrekin asko lagundu zion, batez ere sakeetan atzelariari. Berari eman zioten finaleko jokalari onenaren saria.