2011an antolatu zen lehen aldiz txapelketa hau. Bi mailatan jokatzen da eta bakoitzean antolatzaileek gonbidatutako lau bikotek jokatzen dute; Intxurre PIlota Elkarteko pilotariak beti izaten dira tartean. Eskualdean goi-mailako pilotariak egonik bertakoak izaten dira gehienak, eta hala da aurten ere. Txapelketa laburra izaten da, final-erdiak eta finala. Aurten, jubenil eta nagusi mailako txapelketa antolatzea erabaki da. Hauek izango dira partaideak:
Jubeniletan: Altuna-Aranguren (Alegia-Usurbil); Alberdi-Irazustabarrena (Azpeitia-Alegia); Elola-Murua (Bidania-Altzo); eta Artola-Gaskue (Amezketa-Iruñea).
Nagusietan: Arrieta-Gorrotxategi (Hernani); Eneko Labaka-Telletxea (Albiztur; iazko txapeldunak); Peru Labaka-Erasun (Zizurkil); eta Urbieta-Urretabizkaia (Asteasu-Ikaztegieta). Urretabizkaia atzelari lanetan ariko dela da berrikuntza.
Pilota afizonatua jarraitzen duenak aguro ikusiko du zerrenda horretan daudela maila horietako egungo pilotari gipuzkoar onenak.
Finalak uztailaren 16an jokatuko dira, 18:00etan. Egun honetan profesionalen arteko partida handi bat ere programatuko da, tartean herriko semea, Iñaki Artola. Aurrerago emango dugu horren berri.
Alegiako Elorri frontoian, ostiralean, ekainak 17, gaueko 22:00etan emango zaio hasiera, beraz, edizio berri honi. Elola-Murua eta Artola-Gaskue lehenik; ondoren, Arrieta-Gorrotxategi ariko dira Labaka-Telletxearen aurka. Faborito garbirik gabeko bi partida dira.