Gipuzkoako txapelketako finalak jokatzen ziren ostiralean Alegiako frontoian. Eta jende dexente inguratu zen pelotariak ikustera.
Lehenengo partida buruz burukoa zen, eta bertan Intxurre taldea eta Oñatiko Aloña Mendi taldea neurtzen ziren. Intxurreko Aratz Irazustabarrenak irabazi zuen partidua 22-8. Hasera berdintsu samar hasi bazen ere, Oñatiarra asko eta ondo saiatu zen sake errematean partida azkar bukaerara eraman nahian, Aratzek jokoaren gidaritza hartu zuenean kolpe indartsuagori esker, eta tantoak bukatzen asmatu zuenez 4-6 galtzen joatetik 22-8ra iritsi zen nahiko azkar.
Bigarren partida binakakoa zen eta han ere kolore bakarra izan zen. Usurbilgo bikotea, Exposito eta Aranguren, erraz nagusitu zitzaion Andoaingo Matxain eta Usandizagak osatzen zutenari (22-7).