Irazustabarrena eta Salegi 22-10 gailendu zitzaizkien Garate arrasatearrari eta Usandizaga andoaindarrari. Berehala 6-1eko abantaila hartu zuten eta partida guztian aurretik joan ziren irabazleak. Azkenean tarte handiarekin amaitu zuten partida.
Hala ere, tanto gehienak oso borrokatuak izan ziren eta partida nahiko gogorra izan zen norgehiagoka. Azkenean gorrien indarrak eta asmatzeak hogeita bira eraman zituen. Atzelariak, Salegik, tantoa dominatzen zuen eta Aratzek abiadura handia ematen zion pilotari. Min handia egin zuen alegiarrak moztutako pilotekin. Baina era berean asko saiatu behar izan zuen, eta defentsan lan handia egin zuen.
Hiru tanto egin zituen Irazustabarrenak sakez, eta bukatzerakoan dejada politak eta gantxoren bat utzi zituen. Ikusgarriak baita ere aurkariak, Garatek, egindako hiru edo lau gantxo, Biziak eta zehatzak.
Jende mordoxka hurbildu zen Oñatiko Zubikoa pilotalekura eta kontentu atera zen eskainitako partidarekin.
Urte borobila
Aurten salto nabarmena eman du Aratzek. Jubenil mailan Gipuzkoako buruz buruko txapeldunorde, Udaberriko lau t'erdiko txapeldun, Zornotzako Master kaiolan txapeldunorde eta Amezketako Joxan Tolosaren txapelketan frontoi guztian buruz buru txapeldun orde izan da.