Kirolaldia

Herriko kirol kluben ohiko funtzionamendu eta entrenamenduetako jardunaren datuak bildu ditu ikerketa honek, zalantza eta sorpresa ugari sortu zizkidanak.

Lehen ezustekoa, bilerara deituta zeuden ia hogei kirol entitateetatik hiru bakarrik azaldu zirela ikustea. Ordutegi arazoengatik izango zela pentsatu nahi nuen, baina buruak ezetz esaten zidan; gai honek horren interes gutxi sortzen al du? Bigarren sorpresa, Tolosako kirol jardunean euskararen erabilerak %80tik gora markatu duela.

Pozteko berria da inolaz ere, baina datua entzun bezain laster zalantzek itzala egin zioten %80ari. Zein garratza den horrelako berri pozgarriekin ezin gozatzea. Ez ditut kirol talde guztiak ezagutzen, baina gertu ditudanak eta kasualitatez jende gehien mugitzen dituztenak, ez direla datu horietara iristen uste dut.

Hezitzaile moduan aritzen diren askok ez dute euskara erabiltzen ez kantxan ez kantxatik kanpo, eta eredu diren horiek ez badute euskaraz egiten jai daukagu. Egia da, hala ere, klub askok oinarrizko balio bezala dutela euskaraz aritzea, baina egunerokoan norbanakoak hartzen dituen hizkuntza ohiturei ez zaie behar adina balio ematen, kirola ezagutzen ari diren gazteek kirol erdalduna barneratzen dutelarik.

Zalantzak eta ezustekoak alde batera, hobe izango dugu berri pozgarriekin gelditzea: Tolosako kirol kantxetan euskararen erabilera kalekoa baina handiagoa da. Aisialdian izan ohi ditugun hizkuntza hautuek, beste edozein arlotan izaten ditugunak baina garrantzia handiagoa izaten omen dute. Ez gaude kexatzeko moduan. Zorionak beraz euskaraz disfrutatu eta izerditzen duten guztiei!