René Descartes filosofo frantziarrak hauxe esaten zuen: «Filosofiarik gabe bizitzea, begiak itxita bizitzea da, hauek inoiz irekitzeko asmorik gabe». Agian hori izan da aldaketaren arrazoi nagusia, gizarte eraldaketa alde batera utziz begiak itxita bizitzea eta herritarrak begiak itxita biziaraztea.
Filosofiak norberak egiten duenarekin ez konformatzen erakusten du, bizitzarako hain garrantzitsua den iritzi kritikoa garatuz. Eztabaida, elkarrizketa eta analisi bidez, ikasgela batean egon daitezkeen ideia desberdinak interpretatu daitezke. Ideia horiek gure ingurunea ulertzen eta eraldatzen laguntzen dute. Ikastetxeek honetarako zuten erreminta bakarra izan ohi zen filosofia ikasgaia.
Beste kontu bat da noski, gaur egungo hezkuntza sisteman filosofia nola irakasten den. Ikasgai honek pairatu dezakeen arazo handienetako bat da ikasleek filosofia ikasgaia «txapa» moduan identifikatzea. Klase hauek ezin dituzte soilik kontakizun historikoak bildu; ikasleak izan ditzakeen mugetara lotuta egon behar dute, errealitatea interpretatu eta galderak formulatzera bideratuta.
Ikasturtea amaitu da eta erreflexiorako hilabeteak datoz jarraian. Gizartea begirada kritiko batez erreparatzeko ikasgai honi etorkizunik ikusten ez dioten horiek badute denbora euren azterketa «pendientea» prestatzeko: filosofia oinarrizko ikasgaia izan edo ez izatearen azterketa.
Ikasketa plan berrien mehatxuak egia bihurtu dira azkenean. Filosofia derrigorrezko ikasgaia zen lehen, orain, hautazkoa da batxilergo modalitate bakarrean.
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!