Egizu dantzan!

Donibane jai bezperetan han eta hemengo Tolosako dantzariek zezen plazan, Leidorren nola Euskal Herri plazan ikuskizun hunkigarriak eskaini baitizkigute. Joan den asteburuak eman baitzuen beretik eta irradan aritu baikinen kuadrilla artean, jo ta su, nekatu arte. Eskola urtea amaitzearekin batera, udako egunak kontzertu, jaialdi, herriko jai eta musikaz beteriko ekitaldiak bata bestearen atzetik baitatozkigu, gerri buelta astintzeko proposamenarekin.

Gorputza bere kabuz mintzo ohi zaigu. Kontzienteki batzutan, gu ohartu gabe besteetan. Gorputz mugimendu bakoitzak, esku, beso, begirada edota ibilerak, gutako bakoitza definitzen du. Gorputz mugiera ezak, bestalde, hizketaldietako isiluneek adina esaten dute. Asko erran ere. Gorputza garenaren ispilu da. Dantza, berriz, gorputzaren ahotsa.

Soinarekin olgetan aritzea, keinuekin solastea, horixe da dantza. Gorputz adarren laguntzaz amestea. Izerditu bitartean hegan egitea. Gorputz poesia sortzea. Norbere estiloan, koreografia propioak ernatzea. Dantza, giza espeziea gizakia denetik gorputzarekin komunikatzeko modua da. Sabeleko kezka ilunenak, dantzak askatzen ditu. Barne erraiak aditzera emateaz aparte, norbanakoon energiak kudeatzeko, dibertsiorako eta erlazionatzeko modu bikaina da. Kultura eta garai ezberdin guztietako ezaugarri. Baita gurekoa ere, batzuek enbor sustraitu harrizko jarrera hartzen badute ere. (Barka minduta sentitutakoak…)

Festa giroan murgilduta, egin dezagun ba, dantzan! Erritmoaren malabaristak, errespetuz eta askatasunez beti ere, arnastu bizipoza! Umore ona astinduz, alaitu bihotzak eta libratu barne frustrazioak, beldurrak eta lotsak. Akelarrearen, Bordon dantzaren, bluesaren, erromeriaren edota DJaren konpasera. Lagunekin, bizilagunarekin, profesional, zaletu edota inprobisatzaileekin. Gustura sentitzen zaren horrekin, gaitz askoren kontran, egizu dantzan! Ikerketa zientifiko ugarik dioten lez, dantza osasuna baita!